काठमाडौं । साबिक विजेता ललितपुर सिटी एफसी र धनगढी एफसीले नेपाल सुपर लिग (एनएसएल) मा शनिबार गोलरहित बराबरी खेलेका छन् ।
यो नतिजासँगै तीन खेलमा पाँच अंक जोडेको ललितपुर दोस्रो स्थानमा छ । धनगढी दुई खेलबाट चार अंकका साथ तेस्रो स्थानमा छ ।
दशरथ रंगशलामा दुवै टोलीले पाएका केही अवसरलाई सदुपयोग सकेनन् ।
खेलको नवौं मिनेटमा ललितपुरले अग्रता बनाउने मौका गुमायो । मणिकुमार लामाको फ्रि किकमा इमो इजिएलको हेडरलाई धनगढीका रक्षक काइसेडोले गोल लाइनबाट बचाए ।
धनगढीले पनि १६औं मिनेटमा गोलको मौका गुमायो । गोलरक्षक वालिद बिरोको लामो पासमा अहमद हिजाजीको प्रहार पोल नजिकैबाट बाहिरियो ।
इजिकेलले २१औं मिनेटमा गोल गरे पनि अफसाइड रहँदा त्यसले मान्यता पाएन । ललितपुरले ७१औं मिनेटमा अर्को मौका गुमायो । पापा केबेको उत्कृष्ट क्रसमा केर्भेन्स बेललफोर्टको डाइभिङ हेडरलाई गोलकिपर बिरोले बचाए ।
अहमद हिजाजीको प्रहारलाई ८४औं मिनेटमा ललितपुरका गोलकिपर जेफ्री बाल्टसले उत्कृष्ट बचाउ गरे। इन्जुरी समयमा मणिको फ्रिकिकलाई गोलकिपर बिरोले मुस्किलले बचाउँदै धनगढीकाे संकट टारे ।
तपाईको प्रतिक्रिया !!!
