काठमाडौं। तीनपल्टसम्म अग्रता लिए पनि त्यसलाई जोगाउन नसक्दा नेपाल साफ फुटसल च्याम्पियनसिपमा चिरप्रतिद्वन्द्वी भारतसँग बराबरीमा रोकिएको छ। अत्यन्त रोमाञ्चक बनेको खेलमा नेपाल र भारतले ३–३ को बराबरी खेले।
यस नतिजासँगै दुवै टोलीले दुई–दुई खेलबाट समान ४ अंक जोडेका छन्।
खेलको सुरुआतदेखि नै आक्रामक देखिएको नेपालले पाँचौं मिनेटमै अग्रता लिएको थियो। व्रिकान्त नरसिंह रानाले उत्कृष्ट फिनिसिङ गर्दै नेपाललाई १–० को अग्रता दिलाए। तर त्यो अग्रता लामो समय टिक्न सकेन। त्यसको ठीक एक मिनेटपछि लाल्ट्लुआङ्जेलाले गोल गर्दै भारतलाई खेलमा फर्काए।
२५औं मिनेटमा अमित लामाले शानदार गोल गर्दै नेपाललाई पुनः २–१ को अग्रता दिलाए। तर खेल अन्तिमतिर पुग्दै गर्दा भारतले दबाब बढाउँदै पुनरागमनको प्रयास गर्यो।
३९औं मिनेटमा अनमोल अधिकारीले गोल गर्दै खेल २–२ को बराबरीमा ल्याए। त्यसपछि ४०औं मिनेटमा विजय श्रेष्ठले गोल गर्दै नेपाललाई ३–२ को अग्रता दिलाएका थिए। तर त्यसको केही समयमै भारतका निखिल राजेन्द्र मालिले गोल गर्दै खेल ३–३ को बराबरीमा पुर्याए।
नेपालले उत्कृष्ट प्रदर्शन गरे पनि अन्तिम समयमा अग्रता जोगाउन नसक्दा जित हात पार्न सकेन।
तपाईको प्रतिक्रिया !!!
