काठमाडाैं। मिकेल ओयार्जाबालको दुई गोलको मद्दतमा स्पेनले अस्ट्रियालाई ३–० ले पराजित गर्दै सन् २०१० मा विश्वकप उपाधि जितेपछि पहिलो पटक नकआउट चरणमा जित हात पारेको छ।
अमेरिकाको सोफाइ स्टेडियममा बिहीबार भएको राउन्ड अफ ३२ को खेलमा स्पेनले सुरुदेखि नै बलमाथि नियन्त्रण कायम राख्दै आक्रामक खेल प्रदर्शन गर्यो। दोस्रो हाफमा पेड्रो पोरोले अर्को गोल थपेपछि स्पेन सहज विजेता बन्यो।
स्पेनले यस विश्वकपमा अहिलेसम्म एक गोल पनि बेहोरेको छैन। गोलरक्षक उनाइ सिमोनले लगातार चौथो क्लिनसिट राख्दा अस्ट्रियाले पूरा खेलभर लक्ष्यमा एउटा पनि प्रहार गर्न सकेन।
स्पेनले अब अन्तिम १६ मा पोर्चुगलसँग मंगलबार डलासमा प्रतिस्पर्धा गर्नेछ। १८ वर्षीय स्टार लामिन यामालले खेलमा स्पेनका १० लक्ष्यतर्फका प्रहारमध्ये चार प्रहार गरेका थिए।
बार्सिलोनाका युवा विंगरले प्रतियोगिताकै सबैभन्दा लामो समय मैदानमा बिताउँदै ८५औं मिनेटसम्म खेले। खेलको अन्त्यतिर उनले गरेको शक्तिशाली प्रहार अस्ट्रियाका डिफेन्डर डेभिड अलाबाले गोललाइनमै रोक्दै टोलीलाई थप क्षतिबाट जोगाएका थिए।
स्पेनका कप्तान तथा रियल सोसिडाडका फरवार्ड ओयार्जाबालले ३६औं मिनेटमा मार्क कुकुरेलाको पासमा पहिलो गोल गर्दै टोलीलाई अग्रता दिलाएका थिए। उनले ८९औं मिनेटमा पुनः कुकुरेलाकै उत्कृष्ट पासलाई सदुपयोग गर्दै व्यक्तिगत दोस्रो तथा टोलीको तेस्रो गोल गरे। कुकुरेलाले दुवै गोलमा असिस्ट गर्दै उत्कृष्ट प्रदर्शन गरे।
स्पेनका मुख्य प्रशिक्षक लुइस डे ला फुएन्टेले टोलीको प्रदर्शनप्रति सन्तुष्टि व्यक्त गरे। ‘ठूला टोलीहरूले आवश्यक बेला आफ्नो स्तर देखाउँछन्। आज हामीले उत्कृष्ट खेल खेल्यौं। प्रदर्शन लगभग पूर्ण थियो, तर अझै सुधार गर्ने ठाउँ सधैं रहन्छ, किनकि अबका सबै खेल कठिन हुनेछन्,’ उनले भने।
अस्ट्रियाका गोलरक्षक अलेक्जेन्डर श्लागरले भने उत्कृष्ट प्रदर्शन गर्दै ६ वटा बचाउ गरेका थिए। सन् १९९८ पछि पहिलो पटक विश्वकपको नकआउट चरण पुगेको अस्ट्रियाले सन् १९५४ यता विश्वकपको नकआउट खेल जित्न सकेको छैन।
समूह चरणमा अपराजित रहँदा पनि उपाधि दाबेदारीबारे प्रश्न खेपिरहेको स्पेनले यो जितसँगै आफू पुनः उपाधि होडमा रहेको सशक्त संकेत दिएको छ।
सन् २०२३ मार्चयता स्पेन प्रतिस्पर्धात्मक फुटबलमा लगातार ३५ खेल अपराजित रहेको छ। यही अवधिमा उसले नेसन्स लिग र युरोपियन च्याम्पियनसिपको उपाधि जितेको छ भने २०२५ को नेसन्स लिगको फाइनलमा पोर्चुगलसँग पेनाल्टी सुटआउटमा पराजित भएको थियो।
तपाईको प्रतिक्रिया !!!
