काठमाडौं। बुढानिलकण्ठ नगरपालिका र आइएसए नेपालले १०औं राष्ट्रिय महिला खुल्ला बास्केटबल च्याम्पियनसिपमा लगातार दोस्रो जित हात पारेको छ।
नेपाल बास्केटबल संघ (नेबा) को आयोजनामा कीर्तिपुर कभर्डहलमा भइरहेको प्रतियोगिताको दोस्रो दिन समूह बी मा रहेको बुढानिकण्ठले लुम्बिनी प्रदेशलाई ५४-२५ को फराकिलो अन्तरले हरायो।
बुढानिलकण्डले तीन क्वाटर आफ्नो पक्षमा पार्दा एक क्वाटरमा दुवैले समान अंक जोडेको थियो। बुढानिलकण्डले २०-६, १४-१४, १०-३, १०-२ को प्रदर्शन गर्यो। बुढानिलकण्ठकी लोरिशा गौचन प्लेअर अफ दि म्याच भइन् भने अनुसा मल्लले सर्वाधिक ११ अंक स्कोर गरिन्। बुढानिलकण्ठले पहिलो खेलमा ग्राण्डी स्टार्सलाई पराजित गरेको थियो।
समूह बी कै अर्को खेलमा ग्राण्डी स्टार्सले ट्रेनिङ ग्राउण्डलाई ५५-३४ ले पराजित गर्दै पहिलो जित हात पार्यो। ग्राण्डी स्टार्सले ट्रेनिङ ग्राउण्ड विरुद्ध १५-६, ९-१४, १७-७, १४-८ को प्रदर्शन गर्यो। ग्राण्डी स्टार्सकी विनामनी योन्जनले सर्वाधिक १४ अंक स्कोर गरिन्। उनी प्लेअर अफ दि म्याच घोषित भइन्।
पहिलो खेलमा लुम्बिनीलाई पराजित गरेको ट्रेनिङ ग्राउण्डको भने यो पहिलो हार हो।
यस्तै समूह ए मा रहेको आइएसए नेपालले अन्नपूर्ण बास्केटबल एसोसिएसनलाई ४८-२३ ले हराउँदै लगातार दोस्रो जित हात पार्यो। आइएसए पहिलो क्वाटरमा ५-८ ले पछि परेपनि त्यसपछिको तीन क्वाटरमा १४-६, १५-२, १४-७ ले आफ्नो पक्षमा पार्दै विजयी भयो। खेलमा सर्वाधिक १२ अंक स्कोर गरेकी आर्शा राज भण्डारी प्लेअर अफ दि म्याच घोषित भइन्।
पहिलो खेलमा आइएसए नेपालले लेट्स गो बास्केटबल एकेडेमीलाई पराजित गरेको थियो। यस्तै समूह ए कै अर्को खेलमा सुनसरीले लेट्स गो बास्केटबल एकेडेमीलाई ४१-३३ ले हराउँदै पहिलो जित दर्ता गरेको छ। खेलमा सुनसरीले १२-५, १४-१६, ५-८, १०-४ को प्रदर्शन गर्यो। खेलमा आस्था राई प्लेअर अफ दि म्याच घोषित भइन्। उनले १२ अंक स्कोर गरिन्।
नेपाल बास्केटबल संघले एक दशकपछि महिला बास्केटबलको राष्ट्रिय प्रतियोगिता आयोजना गरेको हो। यस प्रतियोगिता साबा महिला बास्केटबल च्याम्पियनसिपको लागि राष्ट्रिय टिम छनोटको आधार समेत रहेको बास्केटबल संघले जनाएको छ। प्रतियोगितामा सहभागि ८ टोलीलाई दुई समूहमा विभाजन गरेर खेलाइएको छ। समूह चरणको खेलपछि दुवै समूहको शीर्ष दुई टोली सेमिफाइनल प्रवेश गर्नेछन्।
असार ६ गतेसम्म सञ्चालन हुने प्रतियोगिताको विजेताले ५० हजार तथा उपविजेताले ३० हजार रनगद पुरस्कार प्राप्त गर्नेछन्। यस्तै प्रतियोगिताको सर्वोत्कृष्ट खेलाडी (एमभीपी) लाई १० हजार, उदीयमान टोलीलाई १० हजार तथा उपत्यकाबाहिरबाट सहभागी उदीयमान खेलाडीलाई ५ हजार रुपैयाँ प्रदान गरिने संघले जनाएको छ।
तपाईको प्रतिक्रिया !!!
