काठमाडौं । नेपाल पुलिस क्लब र आयोजक स्ट्याग चयाम्पियन्स टेबलटेनिस एकेडेमी स्ट्याग ग्लोबल च्याम्पियन्स टेबलटेनिस लिग– सिजन २ मा शुक्रबार फाइनलमा प्रवेश गरेका छन्।
लैनचौरस्थित राष्ट्रिय टेबलटेनिस प्रशिक्षण केन्द्रमा भएको सेमिफाइनलको पुरुष सिंगल्समा प्रहरीका वंश सिंघलले एपीएफका राजीव चिकबञ्जारलाई ११–७, ११–३ र ११–९ को सोझो सेटमा पराजित गरे। प्रहरी फाइनलमा पुगेको दोश्रो पटक हो। गत संस्करणमा स्ट्याग तेस्रो भएको थियो।
महिला सिंगल्समा प्रहरीकी लक्षिता नारङले एपीएफकी दिया देउलालाई सीधा सेटमा ११–५, ११–२ र ११–८ ले हराइन्। मिक्स डबल्समा प्रहरीका संयोग कपाली र लक्षिताको जोडीले एपीएफका राजीव र अनिता महर्जनको जोडीलाई ११–८ र ११–४ ले पछि पारेपछि तेश्रो सेट नै खेल्नु परेन।
नकआउटमा जुन टिमले पहिले ८ अंक हासिल गर्छ त्यही टिम विजयी हुने नियम छ। त्यस आधारमा प्रहरी समग्रमा ८–० ले विजयी भयो। १ सेट जितका लागि १ अंक पाउने प्रावधान छ।
प्रतिस्पर्धात्मक अर्को सेमिफाइनलमा स्ट्यागले यल टेबलटेनिसलाई समग्रमा ८–६ ले पाखा लगायो। पुरुष सिंगल्समा यलका आदर्श ओम क्षेत्रीले स्ट्यागका हमर साङगालाई ११–९, ११–२ र ११–९ ले पन्छ्याउदै यललाई ३–० को अग्रता दिलाए।
महिला सिंगल्समा प्रहरीकी त्रिशा गोगोइले यलकी मुनमुन कुन्डुमाथि ३–० को सोझो सेटमा जित दर्ता गर्दै खेललाई ३–३ को बराबरीमा ल्याइन् । त्रिशाले ११–६, ११–९ र ११–४ ले बाजी मारिन्।
मिक्स डबल्समा यलका एलेक्स महर्जन र मुनमुनको जोडीविरुद्धको खेलमा स्ट्यागका गनन्जय र त्रिशाको जोडी तीनै सेटमा समान ११–७ को नतिजामा विजयी भए। मिक्स डबल्सको समाप्तिमा स्ट्याग ६–३ ले अगाडि रह्यो। अर्को पुरुष सिंगल्समा यलका एलेक्सले स्ट्यागका प्रवेशलाई ११–८, ११–९ र ११–१० ले पराजित गरेसँगै खेल ६–६ को बराबरी अवस्थामा पुगेको थियो।
निर्णायक तथा अन्तिम स्पर्धाका रुपमा रहेको महिला सिंगल्समा यलकी रविना महर्जन विरुद्ध स्ट्यागकी सुस्मिता खड्काले सुरुका २ सेटको नतिजा ११–८ र ११–१० ले आफ्नो पक्ष पारेपछि प्रहरीलाई आवश्यक ८ अंक पुग्यो र खेललाई अगाडि बढाउनु परेन। लिगमा सेट १०–१० को बराबरी भएमा ‘गोल्डेन प्वाइन्ट’ का आधारमा सेटको नतिजा टुंगो लगाउने प्रावधान छ। फाइनल शनिबार हुनेछ।
तपाईको प्रतिक्रिया !!!
