काठमाडाैं। दशौंं रारा पोखरा स्पोर्ट्स अवार्ड–२०८२ को मिति नजिकिएसँगै मनोनयनमा परेका खेलाडीमध्ये उत्कृष्टको होला भन्ने चर्चा चल्न थालेको छ।
नेपाल खेलकुद पत्रकार मञ्च गण्डकीले यही वैशाख ३१ गते पोखरा इभेन्ट सेन्टरमा विभिन्न ९ विधामा अवार्ड प्रदान गर्दैछ।
वर्ष महिला खेलाडीको मनोनयनमा परेका ३ जनामध्ये सर्वोत्कृष्ट एकजनाले अवार्डसहित स्कुटर प्राप्त गर्नेछन्। मनोनयन पर्नेहरुमा एथ्लेटिक्सकी नारायणी भण्डारी, जुडोकी मनीषा तामाङ र आर्चरीकी मोनिका राना मगर हुन्। उनीहरुको समान विशेषता भनेको सबैजना स्पोर्ट्स अवार्डका लागि पहिलोपल्ट मनोनयनमा परेका हुन्।
नारायणी भण्डारी (एथ्लेटिक्स)
गएको जेठमा १५औं राष्ट्रपति रनिङ शिल्डमा कीर्तिमानसहित उत्कृष्ट प्रदर्शन गरेकी नारायणी भण्डारी आफैँलाई पनि कति इभेन्ट खेलेर कति वटा पदक हात पारेँ भन्ने हेक्का छैन। भाग लिएका हरेकजसो प्रतियोगितामा उनले कुनै न कुनै पदक नजिती फर्किन्नन्।
१५औं राष्ट्रपति रनिङ शिल्डमा उनले २८ वर्षअघिको रेकर्ड तोडेर चर्चामा आएकी थिइन्। ८०० मिटर दौड उनले मात्र २ मिनेट १७ सेकेण्ड ९ मिली सेकेण्डमा पूरा गर्न सफल भइन्। सोही प्रतियोगितामा उनले १५०० मिटरमा स्वर्ण र रिले दौडमा रजत पदक हासिल गरेकी हुन्।
प्रदेश खेलकुद परिषद् गण्डकीले उनको यो उपलब्धिको कदर गर्दै गत वर्ष वर्षकै सर्वोत्कृष्ट खेलाडीको रुपमा नगद ४३ हजारसहित पुरस्कृत गरेको थियो।सन् २०२५ मा उनी पोखरा ओपन नेशनल एथलटिक्स मिटमा १५०० मिटर दौडमासमेत सिनियर नेशनल च्याम्पियन बनेर अझ चम्किएकी छन्।
छोरेपाटन माध्यमिक विद्यालयकी यी छात्रा नारायणीले यतिखेर १२ को परीक्षा दिएकी छन्। नेपाल खेलकुद पत्रकार मञ्च गण्डकीले आयोजना गरेको अवार्डको अर्को विधा ‘पिपुल्स च्वाइस अवार्ड’ मासमेत उत्कृष्ट ५ को मनोनयनमा परेकी छन्।
यसरी दोहोरी अवार्डका लागि दाबेदार नारायणीले खुसी हुँदै भन्छिन्, ‘नयाँ अपरच्यूनिटी पाइयो। यसले हामीलाई अझ हौसला दिन्छ। खेलाडीको मनोबल बढ्दै जाँदा अरु खेलाडीहरु पनि उत्पादन हुँदै जान्छन्।’
मनीषा तामाङ (जुडो)
मनीषा तामाङको खेल करियर तेक्वान्दोबाट सुरु भएको हो। नेपालमा कोरोना महामारीपछि भने उनी बिस्तारै जुडोतर्फ मोडिइन्। उनले अहिले भने एकपछि अर्को पदक दिलाउँदै आएकी छन्।
नुवाकोट ककनीबाट पोखरा आएको उनको परिवारमा दिदीबहिनीहरु पनि खेल क्षेत्रमै छन्। २ दिदीहरु विपना र सोनी तामाङ कबड्डीका राष्ट्रिय खेलाडी हुन्। एक बहिनी सुष्मी पनि तेक्वान्दो खेल्छिन्। सामान्य आर्थिक स्थिति रहेको उनको परिवारमा बाबुआमाका ५ सन्तानमध्ये १२ वर्षीय एक भाइ पनि छन्। मनीषा हाल पोखरा–१४, खाल्टेमसिना बस्छिन्।
पोखराको अमरसिंह माविबाट कक्षा १२ उत्तीर्ण गरेकी उनी ब्ल्याक बेल्टसमेत हुन्। पोखरा रंगशालामा लामो समयदेखि निःशुल्क जुडो सिकाइरहेका रवि चौधरीसँग उनले नियमित जुडो सिकिरहेको बताइन्।
२१ वर्षीया मनीषाले २०८२ माघमा हेटौडामा सम्पन्न २०औं राष्ट्रिय जुडो प्रतियोगितामा ७८ केजी तौल समूहमा रजत पदक जितेकी थिइन्। यसैगरी, जुनियर ओपन नेशनल जुडो च्याम्पियनसिप–२०८१ मा ५७ केजी तौल समूहमा रजत जितेकी जितिन्। दोस्रो प्रदेशस्तरीय जुडो प्रतियोगिता–२०८१ मा स्वर्ण जितेकी उनले नेकोस छैटौं अन्तर्राष्ट्रिय जुडो च्याम्पियनसिप–२०२३ मा जुनियर (६३ केजी तौल समूह) र पोखरामै सम्पन्न नवौं राष्ट्रिय खेलकुदमा ६० केजी तौल समूहमा प्रतिस्पर्धी गरेकी थिइन्। नेपाली खेलकुदमा राम्रो हुँदै गएमा जीवनभर यसैमा लाग्ने आफूको लक्ष्य रहेको बताइन्।
मोनिका राना मगर (आर्चरी)
आर्चरीमा झण्डै डेढ दशकदेखि सही निशाना लगाइरहेकी मोनिका राना मगर वर्ष खेलाडी (महिला) विधामा मनोनयन हुने खेलाडी हुन्। धनकुटाको बेलाहारा स्थायी घर भएकी ३६ वर्षीया मोनिका हाल पोखरा नयाँबजार बस्छिन्। उनी यस्तो खेलाडी हुन्, जसले खेल र पढाइलाई सँगसँगै अघि बढाइन्। एमएस्सी माइक्रोबायोलोजी पूरा गरेर हाल लेखनाथ मेमोरियल स्कुलमा साइन्सतर्फ हेड अफ डिपार्टमेन्ट प्रमुखको जिम्मेवारीसमेत सम्हाल्दैआएकी छन्।
पोखरा रंगशालामा भेटिरहने मोनिकाले सन् २०१४ देखि आर्चरी खेल्न थालेको बताउँछिन्। त्यसै वर्षको दोस्रो इन्डोर नेशनल गेममा स्वर्ण पदक हात पारेपछि उनमा खेल क्षेत्रमा उत्साह बढ्यो। त्यसो त सन् २०१४ मा कोरियामा भएको एशियन गेम खेल्ने मौका पाइन्।
उनले २०८२ सालमा पोखरामा सम्पन्न सातौं नेशनल इन्डोर गेममा एकलतर्फ स्वर्ण जितेकी थिइन्। १३औं नेशनल आर्चरी च्याम्पियनसिपमा रजत पदक हात पारेकी उनी जापानमा हुन लागेको २०औं एशियन गेममा नेपालबाटै छनोट हुन सफल भएकी छन्।
एकपछि अर्को सफलता हात पार्दै आएकी मोनिकाले नवौं राष्ट्रिय खेलकुदमा टिम इभेन्टमा रजत जितेकी हुन्। सन् २०१९ को १३औं साउथ एशियन गेममा टिमतर्फ र सन् २०१८ मा बंगलादेशमा सम्पन्न आईएसएसएफमा कास्य जितेर नेपालको नाम राख्न चम्काएकी छन्।
मनोनयमा परेपछि खुसी हुँदै उनी भन्छिन्, ‘लामो समय आर्चरी खेलिरहँदा यसरी मनोनयनमा परेको थाहा पाउँदा निकै खुसी लागेको छ। अवार्डले हामी जस्ता खेलाडीहरुको झन् उत्साह बढ्छ।’
तपाईको प्रतिक्रिया !!!
