काठमाडाैं। कोलम्बियाले बुधबार बिहान सम्पन्न विश्वकप समूह ‘के’ को खेलमा कंगोलाई १–० ले पराजित गर्दै नकआउट चरणमा आफ्नो स्थान सुरक्षित गरेको छ। कंगोको बलियो रक्षापंक्तिलाई भेद्न संघर्ष गरिरहेको कोलम्बियाका लागि ड्यानियल मुन्योसले निर्णायक गोल गरे।
खेलको ७६औं मिनेटमा मुन्योसले पेनाल्टी क्षेत्रभित्रबाट गरेको बायाँ खुट्टाको प्रहार डिफेन्डरलाई छोएर गोलमा परिणत भएको थियो। प्रतियोगितामा उनको यो दोस्रो गोल हो।
कंगोका गोलकिपर लियोनल म्पासीले सुरुआती २० मिनेटमै पाँच उत्कृष्ट बचाउ गर्दै कोलम्बियालाई लामो समयसम्म गोल गर्नबाट रोकेका थिए। तर‚ मुन्योसको गोल रोक्ने अवसर भने उनलाई मिलेन।
इन्जुरी समयमा कंगोले बराबरी गोल गर्ने दुई उत्कृष्ट अवसर सिर्जना गरेको थियो। तर‚ कोलम्बियाका गोलकिपर कामिलो भार्गासले उत्कृष्ट प्रदर्शन गर्दै नाथानाएल मबुकुको टाढाबाट आएको प्रहार बचाए। त्यसलगत्तै कर्नरबाट चान्सेल म्बेम्बाको हेडर पनि उनले रोकेर टोलीको जित सुनिश्चित गरे।
कोलम्बियाका स्टार फरवार्ड लुइस डियाजले दोस्रो हाफको अन्त्यतिर दुई पटक बल जालीमा पुर्याए पनि दुवै गोल मान्यता पाएनन्। ७९औं मिनेटको गोल फाउलका कारण रद्द भयो भने ८०औं मिनेटको गोल अफसाइड घोषित गरियो।
कंगोले ५२ वर्षपछि विश्वकपमा पुनरागमन गर्दै पहिलो खेलमा पोर्चुगलसँग १–१ को अप्रत्याशित बराबरी खेलेको थियो। तर ‚ दोस्रो खेलमा हार बेहोरेपछि टोली कठिन अवस्थामा पुगेको छ।
समूह ‘के’ मा दुई खेलपछि कोलम्बियाको ६ अंक पुगेको छ। पोर्चुगल ४ अंकसहित दोस्रो स्थानमा छ भने कंगोको १ अंक मात्र छ। यसअघि मंगलबार नै क्रिस्टियानो रोनाल्डोको दुई गोलको मद्दतमा पोर्चुगलले उज्बेकिस्तानलाई ५–० ले हराएको थियो।
अब शनिबार हुने अन्तिम समूह चरणको खेलमा कोलम्बियाले पोर्चुगलसँग प्रतिस्पर्धा गर्नेछ। उक्त खेलमा बराबरी मात्र गरे पनि कोलम्बिया समूह विजेता बन्नेछ। त्यही नतिजाले पोर्चुगललाई पनि नकआउट चरणमा पुर्याउन पर्याप्त हुनेछ।
सन् २०२२ को विश्वकपमा छनोट हुन नसकेको कोलम्बिया हाल फिफा वरीयतामा ११औं स्थानमा छ। दक्षिण अमेरिकाबाट ब्राजिल र अर्जेन्टिनापछि कोलम्बिया तेस्रो उत्कृष्ट टोली मानिन्छ। टोलीले पहिलो खेलमा उज्बेकिस्तानलाई ३–१ ले पराजित गरेको थियो।
फिफा वरीयतामा ४७औं स्थानमा रहेको कंगोको विश्वकप तयारी इबोला संक्रमणका कारण प्रभावित भएको थियो। इबोलासम्बन्धी प्रतिबन्धका कारण धेरै समर्थकहरू प्रतियोगिता हेर्न यात्रा गर्न सकेनन्।
यद्यपि, अफ्रिका कप अफ नेसन्सका क्रममा कंगोका स्वतन्त्रता सेनानी प्याट्रिस लुमुम्बाको जीवित मूर्तिका रूपमा चर्चित भएका समर्थक मिशेल नुकुका म्बोलाडिङ्गा भने यस खेलमा उपस्थित थिए। उनले पूरा खेलभर आफ्नो प्रसिद्ध मूर्तिजस्तै शैली कायम राखेका थिए।
यस खेलसँगै कोलम्बियाका अनुभवी मिडफिल्डर जेम्स रोड्रिगेजले विश्वकपमा आफ्नो १०औं खेल खेल्दै कोलम्बियाका महान खेलाडीहरू फ्रेडी रिन्कोन र कार्लोस भाल्देरामाको कीर्तिमान बराबरी गरेका छन्।
तपाईको प्रतिक्रिया !!!
