काठमाडौं। पोर्चुगलका कप्तान क्रिस्टियानो रोनाल्डोले डेनमार्कविरुद्धको यूईएफए नेसन्स लिग खेलअघि राष्ट्रिय टोलीको प्रशिक्षण शिविर छाडेका छन्।
४१ वर्षीय रोनाल्डोले बुधबार सामाजिक सञ्जालमार्फत आफूले प्रशिक्षण शिविर छाड्ने निर्णय गरेको पुष्टि गरेका हुन्। उनले राष्ट्रिय टोलीका प्रशिक्षक जर्ज जेसुसको पत्रकार सम्मेलनपछि पोर्चुगिज फुटबल महासंघका अध्यक्ष पेड्रो प्रोएन्सासँग कुराकानी गरेर शिविर छाड्ने निर्णय गरेको बताएका छन्।
रोनाल्डोले आफ्नो निर्णयको वास्तविक कारण भने अहिले सार्वजनिक गरेका छैनन्। उनले उपयुक्त समयमा पोर्चुगलका समर्थकलाई त्यसबारे बताउने उल्लेख गरेका छन्। साथै उनले पोर्चुगल र आफ्ना सबै सहकर्मीलाई आगामी खेलका लागि शुभकामना दिएका छन्।
रोनाल्डोको शिविर छाड्ने निर्णय प्रशिक्षक जेसुसले डेनमार्कविरुद्धको खेलमा उनलाई सुरुआती टोलीमा नराख्ने संकेत गरेपछि आएको हो। जेसुसले यसअघि नर्वेविरुद्धको खेलमा पनि रोनाल्डोलाई सुरुआत गराएका थिएनन्। पोर्चुगलले उक्त खेल २–१ ले जितेको थियो।
नर्वेविरुद्धको खेलपछि रोनाल्डोले टोलीसँग सामूहिक प्रशिक्षण पनि गरेका थिएनन्। उनले चोटका कारण नभई जिममा व्यक्तिगत अभ्यास गरेको जनाएको छ। जेसुसले भने रोनाल्डोले प्रशिक्षण गर्न अस्वीकार गरेको दाबीलाई खारेज गर्दै उनीसँग कुनै ठूलो विवाद नभएको बताएका थिए।
जेसुसका अनुसार नर्वेविरुद्ध रोनाल्डोलाई खेलाउने योजना भए पनि खेलको परिस्थितिका कारण उनलाई मैदानमा उतारिएन। रोनाल्डो त्यस निर्णयबाट असन्तुष्ट भएको जेसुसले स्वीकार गरेका छन्।
पोर्चुगलले डेनमार्कसँग बिहीबार नेसन्स लिगको खेल खेल्दैछ। पोर्चुगल समूह ए४ मा डेनमार्क, नर्वे र वेल्ससँगै छ।
रोनाल्डो पोर्चुगलका सर्वाधिक गोलकर्ता तथा सर्वाधिक खेल खेल्ने खेलाडी हुन्। उनले राष्ट्रिय टोलीबाट १४६ गोल र २३४ खेल खेलेका छन्।
तपाईको प्रतिक्रिया !!!
